Nyhetssaker
Forbod mot radio- og tv-reklame to dagar i påska
Radio- og tv-kanalane har ikkje lov til å sende vanleg reklame langfredag og første påskedag. Mange av kringkastarane vel å gi bort reklameplassen til ideelle organisasjonar desse dagane.
Forbodet mot å sende reklame desse dagane gjeld berre for radio og tv. Formålet med regelen er at publikum ikkje skal bli utsett for kommersielle bodskapar gjennom tv og radio på høgtidsdagane, som i år er 3. og 5. april.
Det er fire dagar i året da det ikkje er tillaten å sende reklameinnslag på tv og i radio. To av dei er altså i påska, og dei to andre er første pinsedag og første juledag.
Dersom ein kringkastar bryt regelen, kan Medietilsynet gi sanksjonar i form av ei åtvaring, eit regelbrotsgebyr eller eit tidsavgrensa forbod mot å sende reklame.
– Kringkastarane overheld reklameforbodet på ein god måte. I løpet av dei siste tjue åra har det berre vore nokre få tilfelle der Medietilsynet har oppdaga brot på denne regelen, fortel Hanne Sekkelsten, direktør for juridiske og regulatorisk avdeling i Medietilsynet.
På Medietilsynets sider kan du lese meir om reklame, sponsing og produktplassering på tv og radio.
