Mest til lokale medium når Medietilsynet fordeler 21 millionar kroner til innovasjon

Målet med innovasjonsstøtta er å styrke det norske mediemangfaldet og den opplyste offentlege samtalen gjennom å stimulere til redaksjonell, innhaldsretta innovasjon og utvikling i nyheits- og aktualitetsmedium.

Støtta på omkring 21 millionar kroner går i år til 42 ulike prosjekt. Medietilsynet fekk inn 64 søknader, og det blei til saman søkt om i overkant av 33 millionar kroner.

80 prosent går til utvikling og produksjon av redaksjonelt innhald og digital utvikling

Vel ni millionar kroner, eller 40 prosent av midlane, går denne gongen til prosjekt som skal utvikle og produsere redaksjonelt innhald. Om lag 8,5 millionar kroner, tilsvarande 38 prosent, går til digitale utviklingsprosjekt.

Fleire av prosjekta som får støtte i år, handlar om lokal debatt. Fædrelandsvennen får cirka 500 000 kroner til å utvikle og produsere redaksjonelt innhald til redaktørstyrt, redigert, digital og lokal samfunnsdebatt. Målet med prosjektet er å «ta debatten tilbake» frå dei sosiale media. Også Stavanger Aftenblad og Finnmark Dagblad får midlar til debatt. Stavanger Aftenblad får cirka 360 000 til å utvikle ei debattplattform for unge, mens Finnmark Dagblad får 380 000 kroner til å opprette ein debattportal.

Landslaget for lokalaviser (LLA) har fått til saman to millionar kroner til to ulike prosjekt. Det eine er eit samarbeidsprosjekt mellom fleire lokalaviser som skal bidra til å finansiere lokal journalistikk og innovasjon, mens det andre prosjektet har som mål å få fleire til å søke og ta jobb som journalist i lokale medium.

Støtte til fleirspråkleg lokalradio og andre prosjekt retta mot innvandrarar

Støtteordninga skal også prioritere tenester for personar med funksjonsnedsetjing og prosjekt som er retta mot innvandrarar og språklege minoritetar.

– I år kom det ingen søknader om tenester for personar med funksjonsnedsetjing, men vi fekk fem søknader om pengar til prosjekt som er retta mot innvandrarar og språklege minoritetar. Tre av desse får støtte på til saman 1,7 millionar kroner, seier Velsand.

Radio Inter FM får 270 513 kroner til prosjektet «Flerspråklig minoritetsradio for Oslo», og skal lage sendingar heile døgnet for å formidle samfunnsviktig informasjon på andre språk enn norsk og engelsk.

Fakta om innovasjons- og utviklingsstøtte til nyheits- og aktualitetsmedium

• Ordninga skal fremme mediemangfald og ein opplyst offentleg samtale gjennom å stimulere til redaksjonell, innhaldsretta innovasjon og utvikling i nyheits- og aktualitetsmedium.
• Støtteordninga tredde i kraft 1. juli 2018, og er særleg retta mot små, lokale nyheits- og aktualitetsmedium.
• Aviser som har utfordringar med distribusjonen på grunn av færre postomdelingsdagar, kan få støtte til digitalisering og omstilling gjennom ordninga.
• Prosjekt i små, lokale nyheits- og aktualitetsmedium blir prioriterte. Det same gjer prosjekt som rettar seg mot innvandrarar, språklege minoritetar, og som er retta mot tenester for personar med funksjonsnedsetjingar.

For spørsmål om innovasjonsstøtteordninga ta kontakt med Heidi Schau-Hvatum.

Les meir om innovasjonsstøtta på Medietilsynets nettsider

Desse prosjekta får innovasjonsstønad i 2022